Detaje të reja kanë dalë në dritë, nga ngjarja tragjike e së mërkurës ku një qendër tregtare u përfshi nga flakët, dhe ku mbeti i bllokuar përgjegjësi i sigururisë. Trupi i 33-vjeçarit Arjan Sala, ka marrë disa plagë si ato te djegies vetëm në gjymtyrët e poshtme.
Burime nga grupi hetimor bëjnë me dije se i riu është gjetur rreth orës 2:40 të mëngjesit. Në momentin kur focat zjarrfikëse kanë konstatuar trupin e tij ai ka qenë i mbuluar me rroba. Duke qenë se rrobat kanë qenë të lagura për shkak të ujit që zjarrifikëset pqër të shuar zjarrin, trupi i të riut nuk është djegur plotësisht.
Pas gjetjes së trupit forcat zjarrfikëse dhe oficorë të policisë gjyqësore kanë kryer edhe hetimet për zbardhjen e shkaqeve të zjarrit që për gati 60 orë përfshiu katin e nëndheshëm të qendrës tregtare.
Në një komunikim për mediat, drejtori i zjarrfikësve të Tiranës Shkëlqim Goxhaj ka thënë se në magazinë konfirmohet se nuk ka pasur persona të tjerë.
Goxhaj gjithashtu theksoi se situata ka qenë e vështirë, ndërsa bëri me dije se trupi i 32-vjeçarit është gjetur në mesin e magazinës dhe se ndërhyrja e tij për të fikur zjarrin është bërë me fikëse dore.
“Situata ka qenë shumë e vështirë, por asnjë sekondë nuk është ndalur lufta me zjarrin. Edhe qytetarët edhe vetë familjarët e kanë parë se si është bërë ndërhyrja. Disa media kanë thënë se shërbimi i zjarrfikëses nuk ka mjetet e duhura, por ju them se ndërhyrja për të fikur zjarrin nuk ka ndaluar asnjë moment.
Ritheksoj se që në momentin e parë kur shërbimi është njoftuar janë ofruar pesë zjarrfikëse. Po ashtu edhe unë vetë që në kur jam ofruar për ndihmë nuk jam larguar në asnjë moment. Deri tani ka shumë pak pamje që janë shpërndarë nga lufta me zjarrin, por do të sjellim të tjera. Trupi i të ndjerit është gjetur pranë mesit të magazinës, ai ka qenë duke luftuar zjarrin me fikëse dorë”, tha Goxhaj.
Sa i përket shkakut të rënies së zjarrit bëri me dije se së shpejti pritet që të nxjerrin rezultatet përfundimtare.
“Sot do të nxjerrim konkluzionet dhe do të dalim në një përfundim se për çfarë arsye ka rënë zjarri në magazinë. Ne kemi këqyrur të gjithë pajisjet e inertet në magazinë dhe jam i sigurt që në objekt nuk ka trup tjetër.
Theksoj për të gjithë dyshuesit, se stacioni i shërbimit të zjarrfikës së Bashkisë së Tiranës është në gjendje të përballojë çdo lloj fatkeqësie të rënies së zjarrit”, përfundoi ai.
